Ministrat nga grupi i 20shes përfunduan sot në Londër një takim kritik duke rënë dakort për nevojën e vazhdimit të shpenzimeve për të stimuluar rritjen ekonomike – si dhe nevojën për reforma të isntitucioneve ekonomike botërore për të përfaqësuar më mirë ekonomitë e vendeve në zhvillim.

20 vendet kryesore të industrializuara dhe vendet e reja të industrializuara i mbështesin masat koniunkturore disa miliardëshe të shteteve të veçanta në luftën kundër recesionit. Këtë e theksuan përfaqësuesit e këtyre shteteve në takimin që zhvillohet në Londër. Politika ekspansive monetare dhe financiare do të vazhdojë derisa të garantohet ripërtëritja mbarëbotërore e ekonomisë, theksohet në projektdeklaratën e përbashkët për samitin e G-20-ës, që do t' i zhvillojë punimet në fund të shtatorit. Sekretari gjerman i shtetit pranë Ministrisë së Financave Jörg Asmunssen tha, se askush nuk do që t' i ndërpresë brenda ditës masat koniunkturore. Vendet e G-20-ës janë në unanimitet, që për të ardhmen duhet të përgatitet tërheqja e përbashkët dhe e koordinuar nga masat koniunkturore. Përfaqësuesit e grupit G-20 ranë dakord për standardet e pagesave për menaxherët, por nuk është vendosur tavani për bonuset e diskutueshme. Qëllimi i takimit në Londër të ministrave të financave dhe të shefave të bankave emetuese është përgatitja e samitit të G-20-ës në Pitsburg në SHBA.


Bota Sot