Prishtinë(14:05) – Ish-presidenti i Shteteve të Bashkuara, Bill Clinton ka mbajtur një fjalim para Kuvendit të Kosovës, ku ka theksuar se Kosova tashmë është në rrugën e duhur dhe se institucionet e shtetit të ri janë forcuar.Në fjalim e mbajtur para deputetëve, Clinton theksoi se ishte i nderuar që ndodhet në Kuvendin e Kosovës. Ai theksoi më tej, se Kosova duhet të jetë krenare për atë që ka arritur deri më tani.
“Mendoj që keni bere shumë gjatë 10 viteve dhe jam i bindur se mund ta ndryshoni të ardhmen, mund të krijoni marrëdhënie të mira me fqinjët tuaj. Pjesa më e madhe e shqiptarëve të Kosovës jetojnë në Nju Jork dhe ata janë shumë krenare me ju dhe dëshirojnë aq shumë që të kryeni punën si duhet. Ata janë krenarë me ju sepse po përpiqeni të krijoni një demokraci shumë-etnike”, deklaroi Klinton në Kuvendin e Kosovës.

“Unë do ta vazhdoj luftën për paqe. Jam gati të japë çdo gjë për të ndihmuar Kosovën”, tha ndër të jerash ish-presidenti amerikan. Ai shtoi se tashmë shumë shpejt shteti i ri do të jetë pjesë e NATO-s dhe e Bashkimi Evropian.

“Besoj se e ardhmja do te jetë ndryshe. Kur linda në një fshat të varfër dhe asnjë nga ne nuk kishte mbaruar shkollë, por familja kishte vetëm fermerë, dhe askush nuk ndihej i shtypur, por askush nuk u ndje i shtypur se besonim se do të ndryshonim të ardhmen. Unë mendoj se keni bërë shumë, mund të krijoni një popull një shtet të fuqishëm dhe të jeni në rajon një vend i përfitimeve”, u shpreh Klinton.

Në vijim të fjalës, presidenti i 42-të i SHBA-se theksoi edhe punën e bërë për pakicat në vend. “Mund t’ju siguroj të vazhdoni për të punuar që pakicat të integrohen plotësisht dhe ju do ta beni këtë sepse jeni pjesë e botës së shek 21. Është me rëndësi që njerëzit të jenë krenarë për atë se çfarë janë, përfshirë edhe rrënjet e tyre etnike”, shtoi Klinton. Ai kërkoi gjithashtu nga qytetarët e Kosovës që të mendojnë për të ardhmen dhe jo për të shkuarën.

Si momente shumë të rëndësishme ai përmendi shpalljen e pavarësisë më 17 shkurt 2008, njohjen e Kosovës nga 62 shtete të botës, anëtarësimin në FMN e Bankën Botërore, duke shprehur besimin se Kosova do do të jetë edhe pjesë e BE-së dhe NATO-s.

Presidenti i Kosovës Fatmir Sejdiu tha se Clinton ka pasur një rol të veçantë në pavarësinë e Kosovës, ndaj sipas tij, Kosova do të jetë përjetë mirënjohës ish-presidentit Clinton. "Qytetarët e vendit tim do të jenë përherë mirënjohës dhe falënderues, për përkrahjen në të gjitha periudhat, si dhe për vendimin kapital që morët në një moment të vështirë dhe dramatik, për të ndërhyrë ushtarakisht dhe për të ndalur spastrimin etnik që po kanoste një popull të tërë dhe vrasjen e tij kolektive të planifikuar", tha Sejdiu.

Kryeministri Hashtim Thaçi tha se sot “nderojmë mikun tonë të madh”, duke i shprehur atij mirënjohje për ndihmën e dhënë. “Ish-presidenti i Shteteve të Bashkuara të Amerikës, Bill Clinton është hero i madh për Kosovën”, theksoi Thaçi.

Clinton mbërrin në Prishtinë

Prishtinë (13:07)– Ish-presidenti i Shteteve të Bashkuara Bill Clinton ka mbërritur në aeroportin e Prishtinës.Pas mbërritjes në Kosovë, Clinton i cili viziton për herë të tretë këtë vend, do të marrë pjesë në ceremoninë e zbulimit të shtatores së tij.

Në ambientet e Kuvendit të Republikës së Kosovës, Bill Clintonin e pritën dhe i uruan mirëseardhjen presidenti i Kosovës, Fatmir Sejdiu dhe kryeministri Hashim Thaçi. (foto Telegraf)

start