Presidenti i Kroacisë, Stipe Mesiq, po qëndron në Prishtinë, ku është pritur me nderime dhe ceremoni të lartë shtetërore. Presidenti Fatmir Sejdiu i ndau Mesiqit “Medaljen e Artë të Pavarësisë”, në shenjë kontributi që Mesiq dhe Kroacia kanë dhënë për lirinë dhe pavarësimin e Kosovës. Të dy presidentët i vlerësuan si shumë të mira marrëdhëniet ndërmjet Prishtinës e Zagrebit.
Kroacia do ta ndihmojë Kosovën në realizimin e synimeve të saj për integrim në familjen e bashkuar evropiane, tha sot në Prishtinë presidenti kroat, Stipe Mesiq.
Këto komente, Mesiq i bëri pas një takimi që zhvilloi me presidentin e Kosovës, Fatmir Sejdiu, i cili dekoroi Mesiqin me Medaljen e Artë të Pavarësisë, në shenjë kontributi që Mesiq dhe Kroacia kanë dhënë për Kosovën, lirinë dhe pavarësimin e saj.
Presidenti Mesiq tha se Kosova dhe Kroacia kanë kultivuar marrëdhënie të mira edhe në kohën e ish-Federatës Jugosllave. Ndërkaq, gjatë luftës, ai tha se populli kroat nuk e harron kurrë kontributin e kosovarëve për lirinë e këtij vendi.
Tani, e ardhmja janë integrimet, tha Mesiq, dhe premtoi ndihmën e Zagrebit për realizimin e qëllimeve të Kosovës.
“Kroacia është e gatshme që ta ndihmojë Kosovën me përvojën dhe dijen e vet, përfshirë edhe ndihmën e saj në rrugën e Kosovës drejt integrimeve evropiane, që tani paraqet një të ardhme të rëndësishme”, tha Mesiq.
Presidenti kroat tha se pavarësia e Kosovës paraqet realitet të ri në këtë rajon dhe ftoi të gjitha vendet që ta njohin shtetin e pavarur të Kosovës, në mënyrë që të rritet dhe thellohet bashkëpunimi rajonal dhe evropian.
Ndërkohë, presidenti Fatmir Sejdiu tha se Kroacia paraqet një vend të veçantë për Kosovën dhe ai shprehu dëshirën e tij që një bashkëpunim si ai ndërmjet Kosovës e Kroacisë, të jetë shembull edhe për vendet tjera.
“Kosova ka mbështetje edhe të vendeve tjera dhe një bashkëpunim të mirë edhe me vendet fqinje, përjashtimisht me Republikën e Serbisë”.
“Për ne është me rëndësi që t’i japim sinjalet më të mira për një bashkëpunim të interesit të dy popujve dhe të dy vendeve, por edhe të asaj që ne duam ta lëvizim në kuptimin e plotësimit të vizionit, për të qenë anëtarë të BE-së dhe NATO-s”, tha Sejdiu. Mesiq është pritur në Prishtinë me ceremoni të lartë shtetërore. Ai zhvillon takime edhe me kryeministrin Hashim Thaçi dhe kryetarin e Kuvendit Jakup Krasniqi.
Po ashtu, Mesiq do të marrë pjesë edhe në një seancë solemne të Kuvendit të Kosovës, ndërkaq më pas do të shpallet "Qytetar Nderi i Prishtinës", në ambientet e kuvendit komunal të kryeqytetit.
Gjatë pasdites, presidenti Mesiq viziton paqeruajtësit kroatë në kuadër të KFOR-it, si dhe qytezën e Janjevës, të banuar me popullatë kroate. Në mbrëmje, ai përmbyll këtë vizitë, të parën që një president i Kroacisë i bën Kosovës së pavarur.

bota sot