Besnik Boletini e Myrfet Shasivari
Komisioni Qendror Zgjedhor konfirmoi fitoret e PDK-së, në Prizren dhe Lipjan, sipas rezutateve preliminare, të cilat i shpalli pas mesnatës, në ora 1.00 të ditës së hënë. Kandidati i PDK-së Ramadan Muja ka fituar me 53.2 për qind, përkatësisht 30151 vota, ndërsa ai i LDK-së Hanefi Muharremi 46.8 për qind, apo 26493 vota; ndërsa në Lipjan Shukri Buja i PDK-së ka fituar me 53.7 për qind, përkatësisht me 14209 vota, ndaj kandidatit të LDK-së Imri Ahmeti, i cili ka marrë vetëm 46.3 për qind të votive, apo 12261, bëri të ditur në takimin me gazetarë, kryetarja e KQZ-së, Nesrin Lushta. KQZ-ja nuk ka llogaritur votat me kusht dhe me postë, të cilat numërohen në Qendrën e Numërimit në Prishtinë. Anëtari i KQZ-së nga LDK-ja Florian Dushi, tha se ende nuk ka konfirmime se në disa qendra votimi, nëse janë nënshkruar proceverbalet për shkak të disa parregullësive, por nuk e ka kontestuar rezultatin për asnjërin qytet apo nëse ato mund t’i përmbysin rezlutatet.

Prishtinë, 31 janar – Partia Demokratike e Kosovës ka fituar të dyja qytetet, në të cilat u mbajtën rivitomet e balotazhit, në Prizren dhe në Lipjan, sipas rezultateve preliminare të OJQ-së “Demokracia në Veprim”, dhe rezultateve të PDK-së, si dhe sipas burimeve nga KQZ-ja, kjo parti udhëheq ndaj LDK-së.
Nënkryetari i PDK-së Fatmir Limaj tha se fitorja e PDK-së në Prizren është si rezultat i përkrahjes së qytetarëve por edhe i partive të vogla. Ai tha se fitorja e PDK-së në shumicën e komunave dëshmon se qytetarët e Kosovës janë të kënaqur me qeverisjen aktuale. “Fitorja ka qenë si rezultat i një koalicion me qytetarët dhe ka përfaqësuar qytetarinë, e Prizrenit, kemi pas edhe bashkimin e AKR-së, Partisë së Drejtësisë si dhe partitë e minoriteteve. Pra të gjitha këto kanë ndikuar në fitoren e PDK-së në Prizren. Pra, Qytetarët kanë treguar se PDK-ja është partia e parë në Kosovë dhe besoj që kjo është një mesazh që qeverisja aktuale i ka kënaq qytetarët e Kosovës”, theksoi Limaj
Sipas Rezultateve të koalicioni i OJQ-ve “Demokracia në Veprim”, Partia Demokratike e Kosovës ka fituar në të dy komunat. Në komunën e Prizrenit kandidati i PDK-së Ramadan Muja ka fituar 53.1 %, ndërsa kandidati i LDK-së Hanifi Muharremi 46.9 %. Në Lipjan kandidati i PDK-së Shukri Buja ka fituar 53.6 %, ndërsa kandidati i LDK-së Imri Ahmeti 46.4 %. “Demokracia në Veprim”, ka paraqitur disa raporte gjatë ditës së zgjedhjeve ku kryesisht është raportuar për proces të rregullt zgjedhor, me përjashtim të rasteve të votimeve familjare, si dhe votime të hapura. Udhëheqësi i “Demokracisë në Veprim”, Ismet Kryeziu paraqiti raportin në detaje, ku sipas tij, në Shkollën “Mati Logoreci”, një vëzhgues ka përdorur akreditimin e një personi tjetër. Një rast tjetër ka qenë edhe ndihma që komisionarët e partive politike në vendvotimet 2050a dhe 2059a, ndihmojnë votuesit, kryesisht familjarët e tyre. “Në vendvotimin 2007a/02, ka pasur tentim për të votuar dy herë, si dhe ka pasur përleshje në mes të votuesve jashtë vendvotimit, SH.F. Lekë Dukagjini. Konflikt verbal ka pasur edhe në mes të votuesve dhe komisionarëve në Gani Cavdervashë”, u shpreh Kryeziu.
Po sipas “Demokracisë në Veprim”, në komunën e Lipjanit, janë paraqitur raste të votimeve të hapura. Në disa vendvotime janë vërejtur edhe persona të paautorizuar në qendër dhe jashtë qendrës, ndërkohë në Babush është shënuar një përleshje jashtë qendrës se votimit. Në Magure është raportuar se nuk spërkaten gishtat e votuesve në të gjitha rastet. Por, sipas Kryeziut, këto incidente të vogla nuk e prishin procesin zgjedhor dhe se ky proces zgjedhor ka qenë më korrekt se raundet e tjera.
PDK-ja dhe LDK-ja me akuza reciproke
Shefi i shtabit zgjedhor të LDK-së Lutfi Haziri në një konferencë për media të mbajtur në shtabin zgjedhor të LDK-së në Prizren tha se vota e qytetarëve duhet ruajtur dhe me këtë rast ftoi segmentet shtetërore do ta mbrojnë votën e lirë të qytetarit. Ai tha se edhe kësaj here kanë vërejtur shkelje procedurale, votim familjar, mungesë të llambave dhe aspekteve tjera teknike. “Janë vërejtur disa shkelje procedurale, por edhe tensione nga grupe militantësh që në disa vendvotime kanë pretenduar në mëngjes dhe në mbrëmje të bëjmë presion mbi komisionar dhe vëzhgues e votues. Mirëpo, falë angazhimit tonë dhe të vëzhguesve dhe organeve të rendit është arritur që në disa raste të ndërhyjë edhe policia drejtpërdrejt dhe të evitohet problemet e paraqitura”, u shpreh Haziri
Haziz Hodaj, zyrtar për informim në shtabin zgjedhor të degës së LDK-së në Prizren raportoi për disa parregullsi që në disa qendra votimi i shkaktuan militantë të rivalit politik. Ai me këtë rast, ka përmendur se parregullsi ka pasur në disa vendvotime në zonën e Vrrinit, në lagjen “Tusus” e tjera.
Edhe zëdhënësi i PDK-së Blerand Stavileci, ka raportuar për disa parregullsi që e kanë shoqëruar procesin zgjedhor. Ai ka theksuar se janë identifikuar persona që mbajnë bexhe të falsifikuara dhe veprojnë në emër të monitoruesve të KQZ-së, dhe se për këto parregullsi dhe të tjerat që do të evidencohen deri në fund të procesit zgjedhor, do të adresohen në mekanizmat kompetente. Në orët e paradites së sotme, kanë votuar edhe dy kandidatët rivalë, ai i LDK-së, Hanefi Muharremi në vendvotimin “Motrat Qiriazi”, kurse kandidati i PDK-së, z. Ramadan Muja votoi në qendrën e votimit “Abdyl Frashëri”. Edhe në komunën e Lipjanit janë hapur me kohë të gjitha 26 qendrat e votimit, ku të drejtë vote kanë 48.084 qytetarë, të cilët do të provojnë të përcaktojnë për të tretën herë brenda dy muajve të zgjedhin kryetarin e komunës për mandatin e ardhshëm katërvjeçar. Në garë janë kandidati i PDK-së, kryetari aktual i komunës, Shukri Buja dhe Imri Ahmeti nga LDK-ja.
Raundi i tretë i zgjedhjeve është zhvilluar mirë dhe pa incidente që e dëmtojnë procesin në përgjithësi. Raportet para të KQZ-së flasim për një proces të qetë dhe pa incidente. Sipas kryetares së KQZ-së Nesrin Lushta, vetëm dy vendvotime nuk janë hapur, por sipas saj kjo nuk është ndonjë risi pasi që vendvotimet në fjalë nuk janë hapur as në raundet e zgjedhjeve paraprake. “Sipas të dhënave përfundimtare të KQZ-së të gjitha vendvotimet janë mbyllur në orën 19. Përqindja e daljes në votime deri në ora 19 në komunën e Lipjanit është 27 mijë 446 votues ose 57.08 %. Kurse në Prizren 55 mijë 996 votues ose 40. 62%. Sipas informatave, të cilat i kemi pranuar nga Komisionet Komunale të këtyre dy komunave, të gjitha vendvotimet janë hapur, përveç dy vendvotimeve në komunën e Prizrenit, në Novak dhe Sreçkë, të banuar nga komuniteti serb, ku votuesit do të kenë mundësi të shërbehen nga ekipet mobile, këto vendvotime nuk janë hapur as në raundet e tjera të zgjedhjeve, pra nuk është ndonjë risi”, tha Lushta.

bota sot