Shtypi britanik i së mërkurës hapet me zhvillime të ndryshme, por një pjesë e mirë e tyre kanë fotografitë e tre udhëheqësve kryesorë politikë në Britani që përgatiten për zgjedhjet e përgjithshme këtë verë.
INDEPENDENT thotë se këto zgjedhje do të transformohen, në atë që e përditshmja e cilëson "marrëveshje historike", për tre udhëheqësit kryesorë politikë të vendit që do të marrin pjesë në një seri debatesh televizive të drjejtëpërdrejta.
Megjithëse data për këto debate nuk është caktuar ende, kjo gazetë thotë se mund të jetë caktuar për mbrëmjet e së enjtes që të mos qëlloj në të njëjtën mbrëmje me ndeshjet e futbollit.
Gordon Brown kreu i Laburistëve, David Cameron i konservatorëve dhe Nick Clegg i liberaldemokratëve do të përballen me pyetjet e zgjedhësve gatë një programi televiziv.
TIMES shkruan për gjyqin në Hagë ndaj Radovan Karaxhiçit dhe deklaratat e tij.
Ish udhëheqësi serb i Bosnjës i tha gjykatës se krimet, për të cilat ai akuzohet janë, sipas tij, mite të myslimanëve.
Në sytë e Karaxhiçit, rrethimi 44-mujor i Sarajevës, ku vdiqën 10 mijë vetë ishte e orkestruar, ndërsa masakra e Srebrenicës ku vdiqën mijëra myslimanë ishte e ekzagjeruar dhe numri i viktimave ishte rritur, sipas tij, duke sjellë trupa të tjerë.
Ai tha në Hagë se përfaqësuesit ndërkombëtarë ishin në dijeni të taktikave për të rritur numrin e viktimave.
GUARDIAN e quan dëshminë e Karaxhiçit një përpjekje për të rishkuar historinë.
Ai tha se myslimanët e Bosnjës i kishin vrarë vetë njerëzit e tyre duke i quajtur mite të tjera masakrat.
Jashtë Hagës, të mbijetuarit e Srbrenicës shprehën zemërimin e tyre ndaj deklaratave të Karaxhiçit.
Një prej tyre tha se ai meritonte "çmimi Nobel për gënjeshtra".
FINANCIAL TIMES ka një shkrim për planet shtesë të qeverisë greke, që kanë si qëllim të reduktojnë defiçitin buxhetor.
Kryeministri i vendit, Jorgos Papandreu që është përpjekur që prej fillimit të vitit ta përgatisë vendin për raundin e tretë të masave shtrënguese i tha grupit parlamentar të partisë së tij socialiste "se nuk do të lejonte që vendi të fundosej", por pranoi se duheshin marrë më shumë masa.
Kryeministri grek, shkruan e përditshmja, ka thënë se kërcënimi më i madh për Greqinë ka qënë paaftësia për të menaxhuar borxhin publik.
Një zyrtar i qeverisë greke i thotë gazetës britanike se Evropa kërkonte nga Greqia masa me vlerë prej 3.6 miliard eurosh mbi masat e njoftuara nga Greqia në shkurt, që llogariten shkurtime prej 1.2 miliard eurosh.
Në faqet financiare GUARDIAN shkruan se si zemërimi publik po ndikon negativisht ndaj bankës së investimeve Goldman Sachs, e cila është sulmuar për taktikat e përdorura për pagesa dhe tregti.
Raporti vjetor i kësaj banke të Wall Street-it flet edhe për ndikimin që ka publiciteti negativ në shtyp.
Ky përfundim vjen në një kohë të vështirë për Goldman Sachs, të cilës i është dashur të mbrojë politikën e saj të bonove shpërblyese, sigurive për kreditë, si edhe për rolin e saj në kolapsin e firmës së sigurimeve AIG dhe së fundmi për ndihmën që i ka dhënë qeverisë greke për të marrë borxhe që nuk mund t'i paguante.
DAILY TELEGRAPH shkruan për një formulë të re për gjetjen e gruas apo burrit ideal.
Pas studimit të më shumë se 1000 çifteve, akademikët në Shkollën e Biznesit në Gjenevë arritën në përfundimin se nusja duhet të jetë pesë vjet më e vogël se bashkëshorti, nga e njëjta prejardhje kulturore dhe 27 për qind më inteligjente se bashkëshorti.
Ajo duhet të ketë diplomë, ndërsa ai jo. Kryestudiuesi i ka thënë gazetës se nëse ndiqen këto rregulla shanset për martesë të lumtur rriten me 20 për qind.

bota sot